Semana de Rosalía

Marzo 5th, 2017

Na semana do 20 ao 24, e para celebrar o cumpleanos de Rosalía (que xa fixo 180 anos!), preparamos na biblio un pequeno recuncho rosaliano. Alí tivemos durante os recreos a unha chea de entusiastas que nos leron o seu poema favorito de Rosalía. Aquí vos deixamos algunhas fotos.

Lecturas de adultos

Xaneiro 29th, 2017

O club de adultos xa fixo tamén as súas tarefas de trimestre; xa tivemos as reunións de outubro, novembro e decembro coas lecturas que fumos escollendo e desfrutamos de todas elas na sobremesa.

En outubro lemos A viaxe de Gagarin, de Agustín Fernández Paz. Moitos recordamos unha época da que fomos coetáneos, as veces con morriña, outras veces con tristeza; tamén salientamos a tenrura coa que o protagonista viveu o seu primeiro amor….; gustounos a paisaxe urbana coruñesa, a vida das imprentas e das librerías, a carreira espacial. Tamén valoramos moito a trama, o suspense, o xeito de Agustín de contar a tensión que se vivía durante os últimos coletazos do franquismo.


En novembro lemos El antropólogo inocente, de Nigel Barley. É a primeira vez que lemos algo de non ficción (ata o de agora lemos novelas e algún comic) e arriscámonos a que non lle gustara a todos. Un libro sobre antropoloxía, ou mellor dito, sobre como os antropólogos intentan facer antropoloxía: o autor nos conta todas as súas desventuras durante os meses que pasa en Camerún xunto aos dowayo facendo o seu primeiro traballo de campo. O humor inglés do autor fai que sigamos con simpatía os seus encontronazos cuns indíxenas espabilados de máis. Moi recomendable, non é estrano que sexa un dos libros de antropoloxía máis vendido. Deixámosvos un pequeno resume en vídeo.

 

 

E para pechar o trimestre, en decembro lemos A ferida do vento, de Antón Riveiro Coello. Estivemos acertados porque pouco despois foi escollido como mellor libro do ano pola revista dixital Fervenzas Literarias. No noso grupo de whatsapp so poidemos intercambiar comentarios positivos: tolos entrañables que van aparecendo en escena acompañando a un protagonista que vive ao tempo o seu primeiro (e tráxico) amor e o seu paso ao mundo adulto; o percorrido polo Xinzo dos primeiros anos da democracia, a descripción dos personaxes, da tristura que envolve ao protagonista, a presenza dun Carlos Casares que se presinte dende o mesmo título da novela…

O noso entusiasmo polo libro aínda aumentou cando contamos coa presenza do autor na xuntanza do club: comentounos como fora a escrita do libro, confirmounos o fondo autobiográfico da obra, ensinounos fotos e documentos, falounos da súa relación con Casares, propúxonos un encontro con Xosé Monteagudo para a nosa seguinte lectura… É unha verdadeira gozada oilo falar!

 

Pechando 2016

Xaneiro 23rd, 2017

Última reunión do trimestre, antes das vacacións de nadal. Xuntámonos todos os grupos e comentamos as obras que escolleramos: Quen dá a quenda?, de H. Cajaraville e Un monstruo viene a verme, de P. Ness. Do segundo fixemos a presentación da tradución ao galego, polo que o engadiremos nesta lingua para o curso que ven, xa que foi un libro que gustou bastante: os lectores do club coincidiron en que a historia era emocionante, que as angurias do protagonista se enganchaban no lector ao longo de todo o libro e que o autor resolvía o desenlace con tacto. Ao final da xuntanza proxectamos o trailer da película de Bayona e todos manifestamos a vontade de ver como plasma a relación entre o neno e o teixo, e como se rodan as historias que a árbore lle conta ao neno.

Co libro de Cajaraville ao final conseguimos facer o noso primeiro booktrailer, que vos deixamos aquí a ver se vos gusta. Prometemos (ameazamos) con facer algún mais!

Tamén comentamos a obra de María Menéndez Ponte, Nunca seré tu héroe. Gustounos porque recolle un montón de temas de interés para os adolescentes: o fracaso amoroso e o académico, a amistade, a relación cos pais, o paro, os embarazos non desexados, o racismo… Ben contado, fluído, con personaxes definidos, creíbles, cos que resulta doado familiarizarse… Moi recomendable!

E por último, saímos cos novos libros para empezar o ano!

 

A memoria da choiva

Novembro 29th, 2016

Hoxe tivemos a xuntanza para comentar o libro de Feijoo, que é sempre un éxito entre os nosos lectores. Un clásico dos clubs de lectura! Desta vez deixámosvos a reseña que fixo un dos participantes, sen spoilers:

Esta historia constrúese cunha sucesión de feitos macabros e sanguentos, así como cunha serie de investigacións que levan a atopar a un asasino que vinga a memoria dunha das súas antepasadas, Rosalía de Castro. O libro gustoume moito porque hai momentos de gran tensión, moi cinematográficos.

Recomendado queda a todos aquelas que aínda non experimentaran o placer de misturar Follas Novas e Seven!feijoo

Primeiras reunións!

Novembro 24th, 2016

Este luns comentamos os libros que lemos nos grupos de 1º e 2º ESO.

img_2944

O de Héctor Cajaraville pareceunos moi divertido, poético, máxico, porque o autor sabe facer xogos de palabras ben simpáticos. Pero para os que esperaban unha novela con trama e suspense non acabou de callar, mesmo ás veces se nos facía un pouco repetitivo.

Aínda así, imos intentar facer un book trailer do libro. Mentras tanto, colgamos aquí algunhas consultas que atopamos dirixidas a Divina, a ver se ela é quen de solucionar tamén estes problemas.

Querida Divina: Son o caderno máis triste do mundo; estou rodeado dun montón de libros, todos cheos de palabras ou de bonitos debuxos, pero eu… eu non teño nada! O único que fago é servir para os bolígrafos, eles fan todo o traballo, e eu nada. Estou farto! Saúdos.

Estimada Divina: verás cal é o meu caso, son un rato ao que non lle gusta o queixo e todos os meus compañeiros se rin de min. Non sei que facer, necesito a túa axuda! Bicos.

Estimada meiga Divina: son un avión e teño moito medo a voar. Que me aconsellas? Saúdos.

Querida Divina, teño un problema moi grande: son un cadro impresionista pero perdín a cor e agora parezo unha fotocopia en blanco e negro. Os demais cadros se rin de min e síntome ridículo. Que podo facer? Grazas!

Estimada Divina: son un teléfono moi tímido e cústame moito falar con descoñecidos. Espero que me botes un cable, porque os meus donos están pensando en desfacerse de min. Falamos!

Querida Divina, teño un problema moi doloroso: sempre que paso xunto a unha mesa hai unha forza misteriosa, sobrenatural, que me atrae e me fai tropezar sempre coa pata. Serei moi patoso? Ti que pensa? Saúdos.img_2947

img_2953

 

 

Un novo curso, unha nova andaina do club

Outubro 26th, 2016

img_2496

Este luns de outubro comenzamos a nova andaina do noso club para o curso 16/17. Vimos con moitas ganas e xa levamos a primeira tanda de libros para devorar. Para 1º o novo libro de Cajaraville; para 2º a novela na que se basea a nova película de Bayona; e para 3º-4º a desacougante obra de Pedro Feijoo. Premede neles e saberedes de que van!

quendamonstruoa-memoria-da-choiva

 

Se preferides, aquí tendes dúas invitacións audiovisuais:

A pomba e o corazón!

Febreiro 21st, 2016

Nestes meses de xaneiro e febreiro xuntámonos para comentar dous libros.

O grupo de 1º e 2º da ESO desfrutou de A Pomba e o Degolado, de Fina Casalderrey. Logo de ler os poemas que cada quen escolleu, fixemos un pequeno pasatempo de palabras cruzadas cos nomes de paxaros, a principal afección do protagonista. Logo repasamos a historia do libro, os problemas de acoso escolar, os problemas familiares e sobre todo a fermosa relación co seu avó e como afronta a morte. As referencias aos programas de chat cos que o Degolado se comunicaba con Pomba xa nos pareceron algo desfasados, e tamén coincidimos en que algúns dos temas que trata a autora so aparecen moi de refilón (por exemplo a cuestión dos inmigrantes). Rematamos a xornada vendo algunhas curtas sobre acoso escolar.

IMG_7135

IMG_7138

E no grupo de 3º e 4º comentamos O corazón de Xúpiter, de Ledicia Costas; gustounos a todos un montón e comentamos o grande éxito que estaba a ter a súa autora. Como resumo do que nos pareceu o libro, aquí tendes a reseña que fixo Noelia, de 4º:

“O libro comeza facendo un flashback que nos leva a unha parte próxima ao final. Ao principio este feito desconcertoume un pouco, pero foi un bo detalle.

Isla acaba de mudarse á Rexión, levando o seu telescopio e o seu coñecemento da Astronomía consigo. Dende o primeiro momento crea unha enemistade que lle traerá consecuencias, aínda que por iso remata coñecendo a Mar.

Mar e Isla fanse amigas rapidamente, parecen conxeniar dende o primeiro momento. Logo acaban coñecendo tamén a Anxo, os tres fanse inseparables. Ten os seus roces e pelexan en máis dunha ocasión, todo debido a Xúpiter.

Xúpiter é un amigo de Isla do ciberespacio. Falan todas as madrugadas e cre estar namorada, aínda que non nega sentir algo por Anxo, un amor correspondido. O día de San Xoán , Isla queda nunha vella cervexeira con Xúpiter, vanse coñecer persoalmente despois de tanto tempo. Isto cambiará a vida da protagonista.

A miña opinión é que é un libro de fácil lectura e bo desenrolo. Explica os pensamentos e accións de Isla de maneira que se entende á perfección, non recordo sentirme confuso en ningún momento. En xeral, un bo libro, entretido e que fai adaptarse á situación.”

Club de adultos

Febreiro 2nd, 2016

Este ano tamén temos un club para xente coa ESO superada! E coa lectura como escusa nos reunimos para comentar os libros que nos gusta ao redor dun xantar. Polo de agora levamos un par de reunións (en novembro e decembro): na primeira destripamos (e nunca mellor dito) o libro de Pedro Feijoo, Memoria da choiva, que nos tivo a tod@s enganchad@s e mordendo as unllas; unha novela de suspense con asasinatos truculentos, atmósfera galega e espíritu rosaliano. A verdade é que xa quedaramos prendados co autor dende que o ano pasado viñera a falar das súas obras cos rapaces de bacharelato.

E na segunda nos fumos ao futuro postapocalíptico de Cormac McCarthy, A estrada, que lemos en galego e en castelán. Esta obra nos deixou algo máis desacougados: un pai tentando protexer ao seu fillo nun mundo desolado, queimado, cuberto de cinzas, pasando fame e asediados por bandas de bárbaros; unha linguaxe descarnada e sobria, dura. Recomendamos tamén a versión cinematográfica!

IMG_7120 IMG_7114

Novo ano, novos libros!

Xaneiro 14th, 2016

Na última reunión de trimestre escollimos os libros para as seguintes reunións:

Co grupo de 1º e 2º ESO imos ler a obra de Fina Casalderrey, A Pomba e o Degolado:

E cos nenos de 3º e 4º desfrutaremos do libro de Ledicia Costa, O corazón de Xúpiter:

Balance do primeiro trimestre

Xaneiro 14th, 2016

Xa levamos feitas tres xuntanzas (máis as do club de adultos) e podemos dar por pechada a primeira tandada de libros; as reunións foron animadas, todos viñeron cos deberes feitos (libros lidos, poemas escollidos cos que faremos unha escolma final…) e todos participaron nas discusións sobre os libros.

IMG_6838
IMG_7110 IMG_6842

As valoracións que fixemos das obras lidas resultaron así:

Xabier Docampo, Cando petan na porta pola noite. (grupo de 1º ESO): é un clásico, doado de ler, algún conto nos gustou máis que outro, pero en xeral non nos parecen contos de medo; todos coincidimos en que cada vez resulta máis difícil provocar medo porque estamos moi afeitos a ver cousas máis truculentas no cine ou na televisión.

J. Kelly, A evolución de Calpurnia Tate. (grupo de 1º e 2º ESO): gustounos  un montón a todos; as personaxes, en especial Calpurnia e o irmán máis pequeno, son entrañables. A protagonista pareceunos unha nena curiosa, inquieta rebelde e peleona; e centrámonos máis no tema de como cambiou a situación da muller na sociedade, aínda que o libro tamén trata o papel da ciencia, do método científico e da evolución das especies (falamos tamén un chisquiño de Darwin). Queremos ler a segunda parte, que xa temos na biblioteca!

Agustín Fernández Paz, A viaxe de Gagarin. (grupo de 3º e 4º ESO): somos moi fans deste autor, sempre temos algún libro seu no noso club. Para algúns no grupo  esta obra parece diferente ao resto de Fdez. Paz e non gustou tanto, se cadra porque o periodo histórico no que se desenvolve (finais do franquismo) nos pille algo lonxe: tivemos que facer unha pequena contextualización histórica da represión policial que narra o libro. Gustounos o blog con material e o book trailer.

Marcelo Figueras, Kamchatka. (grupo de 3º e 4º ESO): quixemos ler algo de literatura hispanoamericana e este libro podíase comparar co de Fernández Paz xa que trata o tema da ditadura militar arxentina (1976-83) e como a represión cambia a vida familiar do protagonista. A súa lectura non se nos fixo tan fluída porque o protagonista introduce reflexións sobre cuestións moi diferentes. Pero nos gustou a lingua, o protagonista e o seu irmán, e tamén o persoanxe da nai. Comezamos a ver a película porque o guión é do autor e foi anterior á propia novela.

Xulia Alonso, Futuro imperfecto. (grupo de 3º e 4º ESO): tivemos que deixar o comentario desta obra para máis adiante porque non nos deu tempo a abordala.